बारा : राष्ट्र निर्माण मञ्च नेपालको आयोजनामा शुक्रबार बाराको काल्हवी नगरपालिकामा सुरक्षित आप्रवासन सम्बन्धी सामुदायिक घुम्ती क्लिनिक कार्यक्रम सम्पन्न भएको छ । वैदेशिक रोजगारीमा जान चाहने वा विदेशमा गएर विभिन्न समस्या भोगिरहेका नेपालीलाई सचेत बनाउने र आवश्यक सहयोग पुर्याउने उद्देश्यले एकै दिन दुई फरक स्थानमा सो कार्यक्रम आयोजना गरिएको हो ।

कार्यक्रममा राष्ट्र निर्माण मञ्च नेपालका अध्यक्ष अधिवक्ता निर्मल उप्रेतीले वैदेशिक रोजगारीमा जानुअघि अनिवार्य कागजात तयार पार्नुपर्ने, श्रम स्वीकृति लिनुपर्ने, मेनपावर वा कन्सल्टेन्सीको अवस्था राम्रोसँग बुझ्नुपर्ने र विदेशमा पुगेपछि कानुनी तथा सुरक्षा पक्षमा विशेष ध्यान दिनुपर्नेमा जोड दिए । उनले वैदेशिक रोजगारीका क्रममा समस्या आएमा तत्काल समाधानका उपायका लागि सरकारी निकाय वा राष्ट्र निर्माण मञ्च नेपालसँग सम्पर्क गर्न आग्रह गरे ।

उप्रेतीले विशेष गरी वैदेशिक रोजगारीको नाममा विभिन्न प्रलोभनमा पारेर मानिसलाई बेचबिखन गर्ने, जबर्जस्ती श्रममा लगाउने, अपराधिक गतिविधिमा संलग्न गराउने, शरीरका अङ्ग बेच्न लगाउने, महिलालाई वेश्यावृत्तिमा धकेल्ने वा जबर्जस्ती विवाह गर्न लगाउने जस्ता घटनाहरू बढ्दो क्रममा रहेको बताए । यस्तो आपराधिक गतिविधिबाट जोगिन सचेत रहनै पर्नेमा उनले जोड दिए ।

वैदेशिक रोजगारीमा सम्झौता अनुसारको तलब–सुविधा नपाइएमा, दुर्घटना वा मृत्यु भएमा, अङ्गभंग वा अपाङ्गता आएमा पीडित वा परिवारले तत्काल वडाकार्यालय, जिल्ला प्रशासन कार्यालय वा राष्ट्र निर्माण मञ्च नेपाललाई जानकारी गराउनुपर्ने उनले सुझाव दिए । विदेशमा मृत्यु भएमा परिवारलाई मासिक सुविधा तथा बालबालिकाको पढाइ खर्चका लागि छुट्टै व्यवस्था रहेकोबारे पनि जानकारी दिइयो ।

यसै अवसरमा वरिष्ठ अधिवक्ता रामकृष्ण काप्लेले राष्ट्र निर्माण मञ्च नेपाल तथा अन्तर्राष्ट्रिय आप्रवासन संगठनले न्यायमा पहुँच, मानवअधिकार, आप्रवासन, विपद् व्यवस्थापन, सुशासन, महिला अधिकार जस्ता विषयमा निरन्तर काम गर्दै आएको जानकारी दिए । उनले वैदेशिक रोजगारीका क्रममा मानव बेचबिखनमा परेका व्यक्तिको उद्धार, राहत तथा कानुनी सहयोग गर्दै आएको अनुभव पनि सुनाए ।

त्यस्तै, कार्यक्रमका सहयोगी संस्था अन्तर्राष्ट्रिय आप्रवासन संगठनकी पिएसईएच अधिकारी प्रतिभा रिजालले राम्रो स्पर्श र नराम्रो स्पर्शको अवधारणाबारे सहभागीलाई सचेत गराउँदै यौन दुव्र्यवहार महिलामात्र नभई पुरुष तथा बालबालिकालाई पनि हुन सक्ने भएकाले यसको विरुद्धमा आवाज उठाउनुपर्नेमा जोड दिईन ।

कोल्हवी नगरपालिकाको सहकार्यमा कार्यक्रम दुई स्थानमा सम्पन्न भएको थियो । कोल्हवीको श्री अनुप दिपनी माध्यमिक विद्यालयमा करिब ८० जना विद्यार्थीहरूको सहभागिता रह्यो भने नगरपालिकाको सभाहलमा आयोजित कार्यक्रममा टोल विकास समितिका करिब ९० जना स्थानीयवासी तथा सहयोगी संस्था अन्तर्राष्ट्रिय आप्रवासन संगठनका अभिमान सिंह लामा र करुणा महर्जनको समेत उपस्थिति रहेको थियो ।

राष्ट्र निर्माण मञ्च नेपालले पछिल्ला वर्षहरूमा वैदेशिक रोजगारीका क्रममा देखिएका समस्या, मानव बेचबिखन, यौन हिंसा तथा श्रमिक शोषणका विरुद्ध निरन्तर अभियान सञ्चालन गर्दै आएको छ । सोही अभियानअन्तर्गत बारामा गरिएको सामुदायिक घुम्ती क्लिनिकले स्थानीय तहमा आप्रवासनसँग सम्बन्धित सचेतना जगाउन महत्त्वपूर्ण योगदान पुर्याएको सरोकारवालाहरूले बताएका छन ।